၂၀၁၅ ခုနှစ်ဇူလိုင်လတွင် အကျဉ်းထောင်များ ဥပဒေမူကြမ်းကို မြန်မာနိုင်ငံ ပြည်ထောင်စု လွှတ်တော်တွင် ?ရပ်ရွာအေးချမ်း သာယာရေးနှင့် တရားဥပဒေစိုးမိုးရေး”၊ ?မှုခင်းထပ်မံ မကျူးလွန်စေရန် ကာကွယ်ရေး”၊ အကျဉ်းသားများအား ပြစ်ဒဏ်မှ လွတ်မြောက်ပြီးသောအခါ ထိုက်သင့်သော အသက်မွေးမှု ပညာရပ်များ သင်ကြားတတ်မြောက်စေရန် အတွက် အဓိကရည်ရွယ်လျက် တင်သွင်းခဲ့ပါသည်။ ဤအကျဉ်းထောင်များ ဥပဒေမူကြမ်းမှာ ခေတ်နှင့် မလျော်ညီတော့သော အကျဉ်းထောင်များနှင့် စပ်လျဉ်းသည့် ဥပဒေမူဘောင်များဖြစ်သည့် ၁၈၉၄ ခုနှစ် အကျဉ်းထောင် အက်ဥပဒေ၊ ၁၉၀၀ ခုနှစ် အကျဉ်းသားများ အက်ဥပဒေ နှင့် ၁၉၂၀ အကျဉ်းသားအဖြစ် သတ်မှတ်ခြင်း အက်ဥပဒေ တို့ကို ပယ်ဖျက်ပြီး အစားထိုးမည့် ဥပဒေမူကြမ်း ဖြစ်သည်။ ဤကဲ့သို့ ဥပဒေပိုင်းအရကြိုးပမ်းမှုကို အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့က ကြိုဆိုပါသည်။ ပြည့်စုံသော၊ အသေးစိတ်ကျသော၊ နိုင်ငံတကာ လူ့အခွင့်အရေးဥပဒေ စံညွန်းများနှင့် ကိုက်ညီသော အကျဉ်းထောင်များ ဥပဒေတစ်ရပ်သည် မြန်မာနိုင်ငံ၏ အကျဉ်းသားများအားထိန်းသိမ်းချုပ်နှောင်ခြင်းဆိုင်ရာ အခြေအနေများကို တိုးတက်ကောင်းမွန်အောင်ဆောင်ရွက်ရာတွင် အရေးပါသော နည်းလမ်းတစ်ခု ဖြစ်ပါလိမ့်မည်။ သိုသော် ယခုထွက်ရှိလာသော လူထုကိုချပြသည့် ဥပဒေမူကြမ်းသည် နိုင်ငံတကာ စံချိန်စံညွှန်းများနှင့် များစွာ ဝေးကွာနေပါသေးသည်။ လွတ်လပ်မှုဆုံးရှုံး၍ အကျဉ်းကျခံနေရသောသူများ၏ အခွင့်အရေးကာကွယ်ပေးနိုင်ရန်အတွက် လိုအပ်သော ပြဌာန်းချက်များစွာ ကျန်ရှိနေသေးကြောင်းတွေ့ရပါသည်။ ယခု အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့က တင်ပြမည့် အသေးစိတ် ဆန်းစစ်လေ့လာချက်တွင် နိုင်ငံတကာ လူ့အခွင့်အရေး စံချိန်စံညွှန်းများနှင့် ကိုက်ညီစွာ အကျဉ်းထောင်များဥပဒေကို မည်ကဲ့သို့ပြင်ဆင်သင့်သည်ဆိုသော တိကျသည့် အကြံပြုချက်များကို ဖေါ်ပြထားပါသည်။ လက်ရှိ ဆန်းစစ်ချက်မှာ လွှတ်တော် ကိုယ်စားလှယ်များ၊ အခြားသော အစိုးရ အာဏာပိုင်များ၊ လူ့အသိုင်းအဝန်းအတွက် လှုပ်ရှားကြသူများ နှင့် မြန်မာနိုင်ငံ၏ အကျဉ်းထောင် စနစ်ကို ပြုပြင်ပြောင်းလဲရန် ကြိုးပမ်းနေကြသူတို့အတွက် အသုံးဝင်မည်ဟု ကျွန်ုပ်တို့ မျှော်လင့်ပါသည်။